Asteburu honetako jardunaldiari, bere egunean atzeratu zen Zabalegi-Mujika eta Mendizabal-Iturbe partidak eman zion hasera ostiralean Ametsa trinketean. Mendizabal-Iturbe bikoak 40-37 irabazi zuen partida. Zabalegi-Mujika bikoa ez zen ondo sartu partidan, eta partida osoan zehar, atzetik ibili ziren, momentu batzuetan hurbiltzea lortu bazuten ere. Partida erabakita zegoela zirudienean (38-27), Zabalegi-Mujika bikoak susperraldia izan zuen jokoan, eta Mendizabal-Iturbe bikoaren lasaitzea baliatuz, 38-35 eta 39-37 markagailuan hurbiltzea lortu zuten, baina azkenean Matxalenek eta Oierrek, azken tantua egin, eta 40-37 irabazi zieten partida Julen eta Markeli.
Larunbat goizean jokatu zen jardunaldiko bigarren partida, Ametsako Maiza-Lopetegi bikoak Aviron Bayonnais taldeko Paul-Cassaing bikoaten kontra. Partida borobila jokatu zuten Oierrek eta Xubanek, hutsik egin gabe, eta nagusitasun osoz, 40-15, irabazi zuten partida.
Gazteak mailako 3. partida, igandean jokatu zuten Zabalegi eta Mujikak Urruñarrak taldeko Telletxea eta Hiriart bikoaren kontra, eta 40-12 irabazi zuten inolako estuasunik pasa gabe.
Eta Gazteak mailako asteburuko azken partida, Oragarren jokatu zuten Mendizabalek eta Iturbek. Hauek ere arazorik ez zuten izan Amikuze taldeko Chourrout-Arhiel bikoaren kontra, 14-40 partida erraz irabaziz.
Jardunaldia bikain borobiltzeko, igande goizean, Gaztetxoak mailako 8 partida genituen jokoan Ametsa trinketean. Ametsako 3 bikoek ( Murua I-Larrañaga; Murua II-Calonge eta Gibelalde II-Garmendia) sei partida zituzten jokoan, bakoitzak bi partida, eta denak irabazita, pozez gainezka bukatu zuten pilotari eta euren gurasoek Ametsa trinketean burutu zen jardunaldia. Horrez gain, Ametsako mutikoen gurasoek, iparraldetik etorritako pilotari eta euren gurasoentzat hamaiketako goxo-goxo prestatu ziguten. Eskerrik asko!
Horrelako egunek merezi dute! Zorionak guztioi!
Commentaires