II. Gazteak Xare Irekiaren bigarren jardunaldia jokatu zen ostiralean Ametsa trinketean. Lehen partidan, Halsouet-Iturbe bikoak Zabalegi-Erro bikoaren kontra jokatu zuen. Oxan eta Oier lehen jardunaldiko partida galtzetik zetozen eta irabaztera behartuta zeuden; Julen eta Joseba, aldiz, irabazita zetozen eta aurkariak baino lasaiago atera ziren kantxara, alde horretatik. Hala ere, lau pilotariak konzentratuta sartu ziren partidan, eta, horren ondorioz, oso partida ona ikusi ahal izan genuen; hasieratik amaieraraino, tantu luzeak eta ondo amaituak ikusi genituen. Azken hamarkada arte, Julen eta Joseba (26-30) aurretik ziren markagailuan, baina hemendik aurrera, Oxanek eta Julenek 8-0 partziala egin, eta 34-30 aurretik jartzea lortu zuten. Hemendik aurrera, berdinketekin joan zen partida; azkena, 37na izan zen. Azken hiru tantuak Oxan Halsouetek eta Oier Iturbek segidan egin zituzten, eta 40-37 irabazi zieten Julen Zabalegi eta Joseba Errori.
Bigarren partidan, Arrizabalaga-Mujika bikoak, ozta-ozta, 40-39 irabazi zion Mendizabal-Vila bikoari. Ioritz eta Markel oso gogor hasi ziren eta alde politekin ibili ziren aurretik partidaren erdira arte. Baina Matxalenek eta Jakesek bigarren zati oso ona egin zuten, eta markagailuan parean eta aurretik jartzea ere lortu zuten. Azkenean, inork nahi izaten ez duen berdinketa eman zen, 39-39nakoa, alegia. Azken tantua Ioritz Arrizabalagak eta Markel Mujikak egin zuten, eta, ondorioz, ligaxkako bigarren puntua eta sailkapeneko burua lortu dute
.
Hirugarren jardunaldia, larunbatean, irailaren 24an, 11:00etan hasita, jokatuko da:
1. HALSOUET-ITURBE/ MENDIZABAL-VILA
2. ZABALEGI-ERRO/ ARRIZABALAGA-MUJIKA
Comments