Ostiralean eman genion hasera bete-beteko xareko asteburuari Irurako Ametsa trinketean.
Udaberriko Gazteak mailako bi partida izan genituen jokoan ostiral iluntzean. Lehen partidan, Oier Garmendiak eta Xuban Lopetegik 40-37 irabazi zieten Unai Gibelalde eta Ander Calongeri. Partida lehiatua izan zen, eta lau pilotariak bikain aritu ziren, eta azken hamarkada arte (30-30) ez zen partida erabaki. Azken hamarkadan, Oier eta Xuban, Unai eta Ander baino hobetoxeago aritu ziren, eta garaipena eta ligaxkako lehen puntua lortu zuten.
Bigarren partidan, Ibai Larrañagak eta Aitor Aristik 40-22 irabazi zieten Ander Mujika eta Aimar Herasi. Irabazleak, Ibai eta Aitor, lehen partidan baino hobeto aritu ziren, eta galtzaileak, Ander eta Aimar, ez ziren lehen partidako mailan aritu. Ibaik eta Aitorrek ere lehen puntua eskuratu zuten. Ondorioz, Gazteak mailan sailkapena estu baino estuago dago, lau bikoteak partida bana irabazita eta bana galduta daudelako.
Ikuskizuna eta ikusmina bermatuta daude datorren ostiralean jokatuko den hirugarren eta azken jardunaldirako, bertan erabakiko baitira finala eta finalerdia jokatuko duten bikoteak.
Larunbat arratsaldean Gaztetxoen txanda izan zen. Bigarren taldeko lehen partidan, Adei Gibelaldek eta Mikel Satrustegik 35- 28 hartu zituzten mendean Martina Flores eta Enaitz Irazusta. Lau pilotariak oso ondo aritu ziren, baina Adeik eta Mikelek bukaeran gehixeago asmatu zuten, eta txapelketako bigarren puntua eskuratu zuten. Martinak eta Enaitzek oraindik ez dute punturik lortu, eta azken partida irabazi beharko dute txapelketan aurrera jarraitu nahi badute.
Talde honetako bigarren partidan, Eneko Larrañagak eta Paule Fernandezek 35-22 mendean hartu zituzten Xuban Zubeldia eta Izei Garmendia. Enekok eta Paulek oraingoan ez dute hutsik egin, eta lehen puntua lortuta, Xuban eta Izeirekin sailkapenean berdintzea lortu dute.
Talde honetan ere ez da emoziorik faltako, azken jardunaldian erabakiko baita sailkapena.
Jardunaldiko azken partida Gaztetxoen mailako lehen multzoan, Sara Agirrek eta Ur Aristik 35- 18 irabazi zieten Ekaitz Amado eta Irati Zabalari. Sarak eta Urrek lehen puntua lortu dute. Multzo honetan ere azken jardunaldian erabakiko da sailkapena.
Comments